A orixe da festa ten moito que ver  coa antiquísima tradición «pulpeira» da comarca carballinesa, e coa iniciativa dun grupo de veciños que deciden renderlle unha homenaxe a este exquisito manxar creando e institucionalizando unha romería na que o verdadeiro protagonista fose o pulpo. Para iso contaban co atractivo deste prato gastronómico, con todas as «pulpeiras» de Arcos e o que non é menos importante, co marco natural adecuado, o Parque Municipal do Carballiño, creado no 1927 que ofrecía unhas posibilidades ilimitadas para o desenvolvemento da festa.

A prórimera edición, celebrada en 1962, da «Festa do Pulpo» tivo lugar no mes de setembro coincidindo coa celebración das festas patronais da vila carballinesa. As sucesivas, ata hoxe, celebráronse en pleno verán, cada segundo domingo de agosto, co obxecto de garantir a mellor climatoloxía e a maior asistencia de visitantes.

En 1972, a «Festa do Pulpo» declárase como festa de «Interese Turístico». (BOE Nº65 do 16 de marzo de 1972). Resolución da Dirección Xeral de Promoción do Turismo pola cal se concede a denominación de «Festa de Interese Turístico». Madrid 4 de febreiro de 1972.

En 2012, concédese o título de Festa de Interese Turístico Nacional á «Festa do Pulpo» do Carballiño (Orense). (BOE núm. 173, de 20 de xullo de 2022) . Resolución do 27 de xuño de 2012, da Secretaría de Estado de Turismo, pola que se concede o título de «Festa de Interese Turístico Nacional» á «Festa do Pulpo» do Carballiño (Ourense).

En 2022, concédese o título de Festa de Interese Turístico Internacional á «Festa do Pulpo» do Carballiño (Orense). (BOE núm. 173, de 20 de xullo de 2022) .  Resolución do 4 de xullo de 2022, da Secretaría de Estado de Turismo, pola que se concede o título de Festa de Interese Turístico Internacional á «Festa do Pulpo» do Carballiño (Ourense).